SSA skigiparang dongdikgija okumu chake jingjengata  

TURA: Garo Hills-oni SSA skigiparang, jadokonin man·gija dongenggipa dormahako on·china dabie All Garo Hills School Teachers’ Association-ni ganggopanio Butbar saloni Tura Chief Minister’s Office mikkango dongdikgija okumu chake jingjengatako a·bachengataha.
SSA skigiparang, adita jarangoni dormahako man·kujaenga, uni gimin dormahako on·china dabie changni chang dingtang dingtang biaprango jingjengatenga, aro memorandum-rangko on·ahachim indiba sorkari, mamingkon ja·ku de·gija nitate dongaienga. Krismas aro bilsi gital sepangengjok, indaka somoio dormahako man·gija dongenggipa skigiparang maidake noktangtangni nangnikarangko maniani salrangko chu·sokatgen.
Jingjengataniko a·bachengaode dongdikja ka·anggen ine miksongani dongjachim, indiba district administration aro sorkarini knachakjani gimin aro maming ka·donganiko man·janina jingjengatgipa dolrang mikkangchi dongdikgija okumu chake jingjengatangna tik ka·skaha.
Butbar saloni jingjengataniko a·bachengataon Garo Hills-oni dambonga district-oni skigiparang bak ra·tokeaha. Uandake CMO mikkango jingjengatani somoion dormahako watchina dabie memorandum-ko Chief Minister Conrad Sangma-na West Garo Hills-ni Deputy Commissioner-ni gita on·aha.