TURA: South Garo Hills a·jao donggipa Karukol Higher Secondary School-ni gital building-ko Sukrobar salo, a·dokni Health & Family Welfare Minister James PK Sangma, nokdonggae on·angaha.
Ia skulni gital building-ko rikna gita Supporting Human Capital Development project-ni ning·o Asian Development Bank (ADB), tangka paisarangko dakchake on·ahachim.
Ia gital skul nokko nokdonggae on·angani somoio a·dokni Health Minister, jinmana aganprakangengon, Education ba lekka porani nangchongmotgipa ong·ani gimin talataniko on·angenba, lekka pora donganichi jolo songdongenggipa manderangna mai dakgipa namgnirangko ra·bana man·achim, uarangni giminba talate on·angjolaha.
Karukol Higher Secondary School-ni gital building-ko nokdonggae on·angani somoio Rongara-Siju constituency-ni MLA Rakkam A Sangma, Higher & Technical Education-ni Director A Ch Marak, South Garo Hills a·jani Deputy Commissioner FM Dopth, Superintendent of Police (SP) Rituraj Ravi, dingtang dingtang department-ni officer-rang, skulni dilgiparang aro chatro chatrirangba dongpae bak ra·angaha.
