SHILLONG: Ma·mongni on·gipa scheme-rangko a·doko ra·gatani mamlao MDA sorkario changsatai bakrimgipa party-ni gisepo meligrikgijaniko nikna man·taienga.
“Chinga darangni kosa-kon chakatja aro sorkarini kosakoba re·jaenga indiba ma·mong sorkarini scheme-rangko a·doko parakani bidingo aganchakaniko sing·atani giminsa chinga aganchakenga, maina sing·anikode aganchakna nangtelgen, ine State BJP chief Ernest Mawrie aganaha. State BJP, central scheme-ko ra·gatani bidingo report-ko on·ataha ineba u·iataha.
“Chief Minister-ni a·dokona sokbaon, MDA meeting ba tom·aniko ong·-atchina mol·molanggen, jekodade gimik mamla-rangni bidingon chan-chirimna man·gen.”
BJP-ni State Executive Committee (SEC), Meghalaya-o ma·mongni scheme-rangko ra·gatanio chu·sokjani bidingo bilake chakatenga aro ia mamlako ma·mong sorkari baksa agangrikna tik ka·aha.
SEC tom·aniko adita salrang skangsan ong·a-tangaha ua tom·anio Jal Jeevan Mission (JJM), Garib Kalyan Yojana aro gipin scheme-rango kam ka·ani mamlarango chanchirimangaha. Aro Party ta·raken scheme-o kam ka·ani bidingo ma·mongna chitti seatgen ineba Mawrie agandapaha.
Indake ong·engon Garib Kalyan Yojana-ni gita retailer-rang free ration ba indin sualgipa salantini cha·aniko sualjaenga, unbkasana GI pipe-ni palo bang·a biaprangon plastic pipe-kosa jakkalenga ine badi ka·doanirangko chinga kobor man·soaha, ineba party parakataha.
MDA, ma·mongni on·atgipa tangkarangko public ba jinma manderangna jakkalani palo party-na aro party worker-rangnasa jakkal-skaenga ineba BJP matnangaha.
