TURA: Adita salrangna skang, Dalu-ni bilsi 17 ong·gipa me·chik bi·sa saksako ka·saninggija dake so·ote galanina aro Nagaland a·doko dos gri manderangko sipai dolrangni skatang goe galanina Association for Democracy & Empowerment (ADE)-ba suk ong·gijaniko parakataha.
Adita salrangna skang, Dalu jolo donggipa Chandapara songni bilsi 17 ong·gipa Grenchira M Marak-ko, uni porikka see re·bapilengmiting somoio ma·sina man·gijagipa manderangni rim·gittangange so·ote galanina suk ong·gijaniko parakatengon, dos dakgipa manderangko ta·raken rim·china aro Fast Track Court-o bichal ka·e rakbatsranggipa sastiko on·china ADE-ni president Dalseng Bira Ch Momin didiataha.
“Chingni no-abirangni kosako iandakgipa kragija kamrangko ka·engani gimin chinga namen duk ong·a aro iandakgipa manderangni kosako raken jegalenga. Chingni nogipako ka·saninggija dake so·ote galanio jak donggipa manderangko ta·raken rim·china aro fast track court-o bichal ka·e rakbatsranggipa sastiko on·china chinga dabienga,” ine Momin parakataha.
Nagaland a·dokni Mon a·jao ramram dos gri manderangko bobil dolni manderang ine potchipe army-rangni so·ote galanikoba ADE raken jegalataha aro mikkangchi iandakgipa a·selrang ong·taijana gita salgro salaram a·dokrangoniko Armed Forces (Special Powers) Act (AFSPA)-ko ra·galpilchina gita dabiangaha.
“Nagaland a·dokni Mon a·jao sianggipa dos gri manderangni nokdangrangna chinga kalimpaaniko on·enga aro iandake dos gri manderangko skatang goe galanina sipai dolrangni kosako raken jegalatenga. Ia AFSPA-ara an·ching gita jakgitelgipa a·songo sipai dolrangna skatang bil jakkale rona on·gipa niam gitasa ong·aia, uni gimin salgro salaram a·dokrangoniko ta·raken AFSPA-ko ra·galpilchina chinga dabienga,” ine Momin parakatenba, re·baenggipa December-ni 9 tariko NESO-ni ong·atenggipa jingjengatanio ADE-ba chu·gimik bakko ra·pagen ine parakataha.