Garo Hills-o Trinamool Congress-ko bilakbatatna a·bachenga

TURA: Meghalaya a·doko Indian National Congress (INC)-ni sak 12 MLA-rang, West Bengal a·dokni Chief Minister Mamata Banerjee-chi dilenggipa All India Trinamool Congress (TMC)-o napangani ja·man, Garo Hills-oba TMC-ko bilakbatatna gita kamrangko a·bachengataha aro uandaken Budbar salo INC-ni chadambe dolko dilgiparang bang·batan TMC-o napangaha.
Congress doloni ong·kate TMC-o napanganiko mesokna gita Budbar salo dingtangmancha jinma tom·bimonganiko New Tura kal·chakramo ong·atangaha, jeon Congress dolna kam ka·gipa bang·bea manderangba TMC-na chakpaaniko mesokangskaaha.
Congress doloni ong·kate TMC-o napanggipa bang·bata manderangan, a·dokni gitcham chief minister Mukul Sangma-ko wachanggale Shillong-ni Lok Sabha MP Vincent Pala-ko Congress dolni gital state president songskaahani gimin suk ong·jae TMC-o napangaha ine paraktokaha.
TMC-o napanggipa youth Congress-ni dilgiparangko, Meghalaya Pradesh Youth Congress (MPYC)-ni gitcham president Richard Marak an·tangan dilangaha aro unbaksa Dadenggre-oni GSU-ni gitcham dilgipa Rupa Marak, Tura-ni gitcham MDC Rupert M Sangma, Adamkid A Sangma aro gipin dilgiparangba TMC-o napangtokaha.
Ia tom·aniko ong·atanio Congress-oni ong·kate TMC-o napanggipa membor-rang jinmana aganprakangengon, India a·songo aro Meghalaya a·dokoba Congress dol mongsonggipa opposition dol ong·achim indiba opposition dolni kamrangko chu·sokatna man·jaengani giminsa dingtang cholko sandie, a·doko dingtanganiko ra·bana gita TMC-o napskaaha ine parakangtokaha.
Manderangni bakrimanichi 2023 bilsini Assembly election-o TMC, chegipa ong·gen aro gital sorkariko rike a·dokna dingtanganiko ra·bana man·gen ineba TMC-ni gital dilgiparang parakangtokaha.