SHILLONG: Garo Hills-o Congress dolni bang·bata dilgiparangan da·o ong·kattokengahani gimin mikkangchi Congress dol chu·gimik bon·gen ine United Democratic Party (UDP)-ni working president Paul Lyngdoh parakataha.
“Congress dolni bang·bata MLA-rangan da·o All India Trinamool Congress (AITC)-o naptokaha ine chinga nikna man·enga aro Garo Hills-ode Congress dol bon·srangaha,” ine Lyngdoh, kobor ra·timgiparangna aganaha.
2023 bilsini election-na skang, AITC dolko Meghalaya a·doko bilakbaenggipa dol gita manderang nikenga ineba Lyngdoh aganaha.
Lyngdoh-ni parakatani gitade, batanggimin bilsi 20-ni gisepo, a·dokni gitcham chief minister aro Congress dolko wate AITC-o MLA-rangko napdilanggipa Dr Mukul Sangma-sa Garo Hills-o Congress dolko chena dakchakgipa ong·ahani gimin Garo Hills-osa AITC bilakbatgipa ong·naba gnang.
“Khasi-Jaintia Hills jolrangode manderang dilgipako niesa pu·ontokani gimin political dolrang inditana biapko man·breja. AITC dol Garo Hills-o bilakbagenchimoba Khasi-Jaintia Hills jolrangode inditana nangchakeani dongjawa,” ine UDP-ni working president parakataha.
Opposition dolrangni gisepo ma·ekaniara 2023 bilsini Assembly election-o MDA sorkario bak ong·enggipa dolrangna namgipa chol ong·gen ineba Lyngdoh parakataha.