TURA: Sukrobar salo, East Garo Hills a·jani police-rang, Garo National Liberation Army (GNLA) bobil dolni bimingo bading chiwalgipa mande saksaoniko tangka dabie ra·na jotton ka·ani gimin mande sakgniko rim·aha.
Police-rangni u·iatani gitade, adita salrangna skang ia manderang, Mangsang-o bading chiwale cha·enggipa mande saksaoniko gong lak 50 tangkarangko dabiataha aro uandaken ja·mano tangka dabiatako man·gipa mande, Rongjeng-o police-rangna badi ka·doangaha.
Iani bidingo East Garo Hills a·jani police-rang am·sandianirangko dakenba, Mangsang-ni bilsi 23 ong·gipa Palkan N Arengh aro West Khasi Hills a·jao donggipa Hahim songoni saksa Rakban M Sangma minggipa mandeko rim·na man·aha.
Ia manderangko rim·anio West Khasi Hills, North Garo Hills aro East Garo Hills a·jani police-rang nangrime kamko ka·anichi chu·sokgipa ong·na man·aha ineba kobor on·aha.
“Tangka dabigipa manderang, Hahim Bazar-ona re·ange tangkarangko on·china aganatahachim indiba uamangni tangka ra·na re·bamiting somoio ia mande sakgniko rim·na man·aha. Uamangni tangka dabina jakkalgipa mobile phone-koba chinga rim·na man·aha,” ine East Garo Hills a·jani Superintendent of Police (SP) Bruno A Sangma parakataha.
Ia manderangko sing·sandiangkuna gita Rongjeng-ona rimbaaha aro uamangko sing·sandiani ja·manosa gipinrang jak dongama dongja ukode ma·sina man·gen ineba SP parakataha.
