NAS, Samanda-o Simsangoniko ro·ong bikotaniko jegalata

Williamnagar: Niksamso A·chik soceity (NAS), East Garo Hills Samanda Dolwarigre-o Simsang chibimaoniko ro·ong bikotaniko namnikjae jegalataha. Simsang chima Garo Hills-ni ro·batgipa chibima ong·a jekon Garo Hills-ni janggi silchi ineba agana. Bang·arangan Simsang chibima rikama ba sepango viewpoint, tourism centre ba picnic spot-ko rikna miksonga donga, indiba Garo Hills-ni ia mingsinggipa chibimako rongtale aro ripinge rakkianiara an·chingni daito ong·jama? ine NAS-ni General Secretary Tengrak Marak sing·a gnang uni kattako donaha.
“Chinga darangni oktangna kam ka·aniko champengna nangnikja indiba Garo Hills-ni mongsonggipa Simsang chimako nosto ka·nade on·skajawa. Niatgemchimode political dilgiparangonin ja·pang ja·diloni kam ka·bagiparang gimikan apsan ku·cholsan ong·e Simsang chimako ripingna re·mikkangna nanga. Samanda Dowarigre-o Simsangoniko ro·ong bikotaniko nike namen suk ong·jaha. Beben uamangni kam ka·aniko niam gri ong·a inede ong·ja indiba Garo Hills-ni samtangtango donggiparangni gitade niamgri ong·skaa.  Uni gimin Simsangoniko ro·ong bikotaniko dontongchina mol·molatenga, dontongja ong·ode mikkangchi rakgipa ja·kuko de·angskagen, ineba Tengrak Marak mikrakataha.