WGH-ni DMCS Balachandao skanggipa Exhibition-cum-Sales Day-ko ong·ata

TURA: West Garo Hills a·jani ning·o ga·akgipa Balachanda-ni sak 250 me·chikmarangchi apsan bakrime challaienggipa Dondime Multi-Purpose Cooperative Society (DMCS), Sukrobar salo Balachanda Tinalio uamangni skanggipa Exhibition – cum – Sales Day-ko dal·bee ong·atangaha.
Ia dal·begipa program-ko ong·atani somoio, 47 Rajabala Constituency-ni local MLA, MD Adul Saleh salni dal·batgipa sokgipa ong·e salsani program-ko oprake on·achi mikkim gnangataha.
Program-ko a·bachengatani somoio DMCS-ni General Secretary, program-ona sokbagipa sakantiko rimchaksoenba, bakko ra·pagipa sakantina Balachanda aro uni wilwilao DMCS-ko a·bachengatani miksonganiko agan-talate on·angaha.
Uni jinmarangna agan-talatengon, “Chingni Balachandao DMCS-ko a·bachengataniara, chinga cholgri-apgripagipa ma·giparang jolo ba a·dok-chigatango dal·gipa chugipa bading-chiwalaniko jako ra·e challaipana man·jaoba, chingni a·bao ge·e-game man·pagipa biterangko aro songo-noko biltang-jaktangchi tarigipaaro chinga an·tangtangni changa sapachi sike moe man·pagipa rokkomari bosturangko pale-sule cha·paachi chonbegipa bading-chiwalani a·bakuona re·chakkatna aro uarangko dondipgija kamko ka·achi an·tangtangni janggi tangani cholko nambata gadangona tang·doatna miksonganian ong·a” ine parakataha.
Uandake, salni dal·batgipa sokgipa ong·e Saleh jinmarangna aganprake on·engon, “Ian angni MLA-ko man·chengaoni skanggipa changna joltango dal·begipa program-ko ong·atgipao bakko ra·chenggipa ong·enga ine aganenba, Balachanda jolo DMCS-ko bikote an·tangtangni janggi tangani gadangko ra·doatenganiara gipinrangna namgipa dakmesokani ong·pilskaenga” ine aganaha.
Uarangsan ong·aigija, Rajabalani MLA, an·tangni bil ama dipet DMCS dolni me·chikmarangna mikkangchi dakchakaniko on·a ku·rachakangaha aro me·chikma dolni aro jolo songdonggipa dolni seachi dabianggipao pangchake DMCS-na community hall-ko rikchina gita tangka gong lak 2.5-ko on·e dakchakangna gita ku·rachake ra·angskaaha.
Indake ong·engon, ua dal·begipa program-ona okamako man·e sokbagiparangara District level Cooperative Society-ni officer, block level cooperative society-ni manager, dingtang dingtang department-ni officer-rang aro jolni nokmarang sakdok aro gipinrangan ong·achim.
Apsandake, program-ko dingtang dingtang chrok-mesaachi aro dakmesokachi nambee aro nitobee ong·atangaha. Uandake, salni mongsonggipa sokgiparangoni jinmarangna aganprake skidape on·anggiparangara, District level Cooperative Society-ni office, Self Help Group aro Cooperative Society-ni dingtanggrikaniko agan-talatangengon, block level cooperative society-ni manager, Eugene T. Sangma, Cooperative Society-ko challaiengachi songna-nokna, joltangna, a·jana aro a·dokna maikai namgni ong·gen aro maikai an·tangtangni janggi tangani gadangko tang·doatna man·gen iani bidingo che·em che·em skie on·achi bakko ra·pagipa me·chikma dolrangko didiangaha. Uamangna agreba Balachanda-ni nokma aro DMCS-ni president-ba agan-taldapate on·aha.
Salsani program-ko salni dal·batgipa sokgipa Exhibition-ko oprake on·enba uarangko niroroe ra·angachi program-ko matchotataha.