TURA: Da·o dipet bank-ni dingtang dingtang kamrangna porikkarangko sechakgipa biaprang dongkujaengani a·sel Garo Hills-ni chatro chatrirang, gipin biaprangonasa re·ange porikkarangko sena nangtokengani gimin Garo Hills-oba State Bank of India (SBI)-ni examination centre-ko probationary officer aro clerical staff-ni kamrangna Tura-o kulichina gita Garo Students Union-Central Executive Committee (GSU-CEC) dabiangaha.
GSU-CEC-ni president Tengsak G Momin-ni parakatani gitade, Garo Hills-oba bank aro uandake dingtang dingtang kamrangko ka·na chu·onga gita lekka pora donggipa chadamberang gnang indiba Garo Hills-o porikka sechakani biaprang dongjani a·selan bang·a changon gisik matsramgipa aro buda budi dongpagipa A·chik chadamberang iandakgipa kamrangko ka·pana chol ong·jaengachim.
“Da·o dipet Garo Hills-o bank-ni kamrangna porikka sechakani biaprang dongjani a·selan chel·a biaprangonasa re·ange porikkarangko setokna nangenga indiba iandake chel·a biaprangona songreangani kattara chatro chatrirangna korosni gita aro dingtang dingtang cholrangni gitaba neng·nikanirangko chagrongna nangani katta ong·enga,” ine Momin parakatenba, Garo Hills-ni chadamberangnaba iandakgipa cholrangko on·na gita Tura-o SBI-ni examination centre-ko kulie on·na nangenga ine SBI-ni official-rangko didiataha.
Adita salrangna skangsan, Garo Hills-oni FKJGP dolba, Garo Hills-o bank-ni kamrangna porikka sechakani centre-rangko kulie on·china dabiangahachim ine nikna man·a.