SHILLONG: Meghalaya a·doko Krismasko kusi ong·e manina on·china gita Congress dolni didiangani ja·man, BJP dolni dilgipa Rocky Hek-ba, Krismasni somoirango COVID-ni niamrangko ra·gatjachina gita a·dok sorkariko didiangaha.
Krismasni somoirango sorkari niamrangko ra·gate, Krismasni gitrangko ring·na aro jinma tom·anirangko dakna on·jaenga ine janapatengon, Cherry Blossom Festival-ko ong·atanion manderang jinma jinma tom·dakahaoba maming champenganirangko dakjaha indide maini gimin da·o Krismasni somoiosa sorkari niamrangko ra·gate manderangko kusi ong·e manina on·jaenga ine BJP-ni dilgipa, a·dok sorkariko sing·doangaha.
Adita salrangna skangsan, Shillong songjinmao Cherry Blossom Festival-ko ong·atangahachim aro ia festival ba manianiko ong·atanio hajalni hajal manderang ia manianiko nina gita tom·chimongbatokahachim.
Una skang, apsan daken Garo Hills-oba Me·gong Festival-ko Babadamgre songo ong·atangahachim aro ia Me·gong Festival-ko ong·atanioba hajal hajal manderangni tom·bimonganirangko nikna gita man·ahachim.
