TURA: Re·anggipa Bristibar attamchibara South Garo Hills a·jao Anti Narcotics Task Force (ANTF)-ni sipairang, mande saksako pekatgipa samrang (Yaba Tablet)-rang baksa Baghmara-ni Tourist Lodge-oniko rim·na man·aha.
Police-rangni u·iatani gitade, Bristibar attamchibara 3:45 bajimango, drugs ba pekatgipa samrangko badingenggipa mande saksa, South Garo Hills a·jani Baghmara Tourist Lodge-ona mande saksana ra·angenga ine koborko man·soaha aro bakan Baghmara police station-ni police officer, Baghmara-o donggipa ANTF-ni sipairang baksa Tourist Lodge-ona re·angaha.
Tourist Lodge-ona sokangon police-rang, Ryan Ashee S Marak minggipa mandeni jolonggaoniko gram 291 ong·gipa rong 3010 WY/Yaba tablet-rangko man·aha. Ia mandeko rim·ani ja·man police-rang, uni AS-01-AQ-5949 Omni Maruti Suzuki gisim garionikoba sandion gram 198 ong·gipa rong 2016 Yaba tablet-rangko man·dapaha.
Ja·mano ia mandeko sing·sandiangkuna gita police-rang, uni gari baksa Baghmara police station-ona rim·angaha aro iani bidingo dingtangmancha case-ko register ka·aha ine police officer-rang u·iataha.
