SHILLONG: Sak 12 MLA-rangni Congress dolko watgale Trinamool Congress (TMC)-o napanga-niara Indian Constitution-ni Tenth Schedule ning·o on·gipa Paragraph 4-ni gitade niamo ong·aia aro ia sak 12 MLA-rang, Assembly-oniko ra·gala man·na kraja ine Bristibar salo Meghalaya Legislative Assembly-ni Speaker Metbah Lyngdoh, bon·kame parakataha.
Congress dolko watgale TMC-o napanggipa sak 12 MLA-rangni kosako ja·kuko de·china aro Assembly-o membor ong·a-oniko ra·galchina gita Congreess dolni MLA Ampareen Lyngdoh, Meghalaya Assembly-ni Speaker-na sedoatahachim ine nikna man·a.
Congress dolko watgale TMC-o napanggipa sak 12 MLA-rangara, a·dokni gitcham chief minister Dr Mukul Sangma, Marthon Sangma, Jimmy D Sangma, Lazarus M Sangma, Miani D Shira, Dikkanchi D Shira, HM Shangpliang, Zenith M Sangma, George B Lyngdoh, Winnerson D Sangma, Charles Pyngrope aro Shitlang Pale- uamang ong·a.
Indake ong·engon, Congress MLA Ampareen Lyngdoh-ni badi ka·doanina ia sak 12 MLA-rang pilakan an·tangtangni gita aganchakanirangko on·anio pangchake, Congress-oni ong·katgipa sak 12 MLA-rangko Assembly-o membor ong·aniko ra·galna Assembly-ni Speaker jechakaha ine Assembly Secretariat-oni koborna u·iataha.
