M’laya-Assam-ni sima arini golmalko Jan 15-ni gisepon namatna tik ka·a

SHILLONG: Re·anggipa Budbar salo Assam aro Meghalaya a·dokni chief minister-rang, Guwahati-o tom·e chanchirimangenba, a·dok damgnini simarango meligrikna man·jaenggipa biaprangoni mitam biap-rangkode re·baenggipa January 15 tarikni gisepon namatna gita tik ka·e donangaha.
Ia tom·anio Meghalaya a·dokni Deputy Chief Minister Prestone Tynsong-ba dongpae bak ra·angaha aro tom·a matchotani ja·mano kobor ra·timgipa man-derang baksa agangrik-engon, a·dok damgnini simarango meligrikna man·-jaenggipa dam 12 biaprang gnang aro ia dam 12-oni skanggipa bako dam 6 biaprangko namat-chengna kam ka·engani gimin ia dam 6 biaprangoni mitam biap-rangkode January 15 tarik ba una skangan namatna gita a·dok damgnini chief minister-rang, ku·rachak-grikangaha ine Tynsong parakataha. Ia tom·aniko Guwahati songjinmani State Guest House-o ong·a-tangaha, jeon Meghalaya a·dokni Chief Minister Conrad Sangma aro Assam a·dokni Chief Minister Himanta Biswa Sarma sak-gnian bakko ra·anga-hachim. A·dok damgnini sima-rango meligrikgijaniko a·dok damgnian namatna nangniktokengani gimin ia tom·ani bewalan chu·sok-gipa ong·aha ine janapa-tengon, a·dok damgnini simarango meligrikna man·jaenggipa biaprangoni mitam biaprangkode chief minister sakgnian, re·baenggipa January 15 tarikni gisepon namatna gita manchiangaha ine Meghalaya a·dokni Deputy Chief Minister parakataha.
A·dok damgnini regional committee-rangan December 31 tarikni gisepode report-rangko a·doktangtangni chief minister-rangna on·gnok ine janapatengon, regional committee-rangni report-rangko on·ani ja·man a·dok damgnini chief minister-rang, January 15 tariko ba una skangan apsan asonge chanchirimangtaina sienga ine Tynsong parakataha.
Meghalaya aro Assam a·dokni gisepo meligrikna man·jaenggipa dam 12 songrangoni damdok biaprangko skanggipa bako namatchengna a·dok damgnini chief minister-rang tik ka·manahachim aro ia biaprangara, Meghalaya a·dokni West Khasi Hills, Ri Bhoi aro East Jaintia Hills a·jani ning·o donggipa Tarabari, Gizang, Hahim, Boklapara, Khanapara-Pilangkata, Ratacherra aro Assam a·dokchipakni Cachar, Kamrup Metro aro Kamrup a·jarang ong·engachim.