TURA: Gam-jinrangni kosako nokgipa ong·na gita Panchayati Raj Ministry-ni ning·o ma·mong sorkarini ra·gatgipa Svamitva Scheme-ko Meghalaya a·doko aro mongsongbate Garo Hills-o ra·gataniara jolo songdongkamenggipa manderangna namgni ong·ani pal batesa namgijaniko ra·baani gita ong·gen ine Association for Democracy & Empowerment (ADE) parakatenba, Meghalaya a·dokode ia scheme-ko ra·gatkujachina gita didiataha.
Iani bidingo Garo Hills Autonomous District Council (GHADC)-ni Chief Executive Membor (CEM) Benedic R Marak-na sedoatengon, ia scheme-ko a·doko ra·gatna skangba dingtang dingtang dolrang aro a·doko songdongenggipa manderang baksa chanchirimchengchina gita ADE-ni president Dalseng Bira Ch Momin didiataha.
“A·doko ia scheme-ko ra·gatna skangba ia scheme-ni bidingo che·em che·em name nipiltaina nangenga ine chinga bebera·a. Meghalaya a·dokara Sixth Schedule a·dok ong·ani gimin aro Bangladesh a·song baksa nangchapgipa a·dok ong·ani gimin indakgipa scheme-rangko ra·gatna skang, u·i-ma·sigipa manderangni agan-ku·pattianirangko ra·an baksana a·doko songdongenggipa manderangnaba agan-talate on·chengna man·ode nambata. Ia scheme-ko an·chingni a·doko ra·gatanio mingsa kenna nanganiara an·chingni songsalo me·chikkosa ra·ani gimin gam-jinrangkoba ma·gipaoni demechikgipanasa on·rika aro iandakgipa niamrangko ja·rikanio an·chingde gipin a·dokrang baksa namen dingtanggrika,” ine ADE-ni president parakataha.
Ia scheme-ko ra·gatanio minggipin kenna nanganiara, Garo Hills-ni samba jolrango donggipa sima arirangoni niam gri napsrukbae songdong a·chaanian ong·enga ineba Momin parakataha.
“Garo Hills-ni badiaba badiaba bakrangode niam gri napsrukbae songdong a·chaanirang batroroengani a·selan mandeba jelbra jelsubatengaha. Jongkipara a·kingo skangode nokdang 200-mangsan dongaiachim indiba da·o iandake niam gri songdong a·chaenggipa manderangni a·selan ia songo nokdang 300-na batpilengaha. Ramdenggagre a·kingode iandake niam gri songdong a·chaenggipa manderangan niam gri ro·ong jetani karkanarangko bikote an·chingni a·brirangko aro chiring chibisikrangko nosto ka·engaha. Wadagokgre songoba nokdang 200-na baten niam gri songdong a·chaenggipa nokdangrang gnang. Iarangni bidingo chinga gipin NGO-rang baksa skangonin changni chang sorkarina u·iatahachim indiba da·onan iani bidingo maming ja·kurangko de·kujaenga,” ine Momin parakataha.
Jolo songdongkamenggipa manderangna nangchakeaniko ra·banagipa scheme-rangko ra·gate on·ani pal ma·mong sorkari, niam gri napsrukbae songdong a·chaenggipa manderangko champengsona man·na gita an·tangari chalaienggipa Autonomous Council, Nokmarang, NGO-rang aro uandakgipa dolrangna bilko on·na man·ode nambata ineba ADE-ni president parakataha.
A·songni je biaprangon, a·a gri chia gri ong·gipa manderang, galchipako man·gipa manderang aro cholgri ong·gipa manderang songdongbata, uandakgipa biaprangosa ia Svamitva scheme-de namgni ong·gen ine talataniko on·angengon, Meghalaya a·doko songdongenggipa manderangnade iandakgipa gam-jinrangko man·rikani niamrang dongani gimin ia scheme-ko ra·gatgija name nipiltaichengna nangenga ine Momin parakataha.
Iani bidingo ma·mong sorkari baksa agangrike ia scheme-oniko a·dokko aro Garo Hills-ko watna didichina gitaba Momin, GHADC-ni CEM-ko mol·molataha.