SHILLONG: Mijal Mongolbar salo, Meghalaya a·dokni Chief Minister Conrad Sangma-ba Manipur a·doko Mao Students Union (MSU)-ni bilsi 88 gapaniko manijole Makhel Heritage Conclave-ko ong·atanio bakko ra·angaha aro ia tom·anio Manipur a·dokni Deputy Chief Minister Joykumar Singh Yumnam aro Manipur a·dokni gipin dilgiparangba dongpae bak ra·angaha.
Ia tom·anio Meghalaya a·dokni Chief Minister jinmana aganprakangengon, Mao Students Union-ni bilsi 88 gapaniko manina gita ia Makhel Heritage Conclave-ko ong·atengani gimin an·tangni kusi ong·aniko parakangenba, jatni daka rikani aro jatni man·rikgipa gam-jinrangko ripinganio politics aro jatni daka rikani kamrangni mongsonggipa ong·ani gimin aganangaha.
Chadamberangan a·songni bil aro ra·bianirangba ong·a ine janapangengon, a·songni namroro silroroanina chadamberangni bil aro changa sapanirangko nama bewalo jakkalchina gita Sangma didiangaha.
Chadamberangni bilko ong·gija kamrangna jakkalgenchimode uan a·songko nisiani cholrangba ong·gen ine janapatengon, a·songko rikanio chadamberangko jakkalgenchimosa a·song namroro silrorona man·gen ine a·dokni Chief Minister parakataha.
Meghalaya a·doko ra·gatenggipa Youth Policy-ni gimin talataniko on·angengon, ia policy ba niamni ning·o Meghalaya sorkari, chadamberangni changa sapanirangko dingtang dingtang namroro silroroani kamrangna jakkalna miksongenga ine Sangma parakataha.
Chief Minister-ni parakatani gitade, ia Youth Policy-ni ‘One Skill One Talent’-chi sorkari, chadambe sakantinan jakni kam mingprakko skie on·na aro chadamberangni changa sapanirangko namdapatna miksongenga.
An·tangtangni u·i-ma·sianirang baksa a·doktangtangosan nape dongaigija a·gilsakni gipin biaprango donggipa chadambeskarang baksa susagrikgiparang ong·china gitaba Sangma, ia tom·anio bak ra·gipa chadamberangko didiangaha.
Meghalaya a·doko ra·gatenggipa Early Child Development Program-ni gimin janapatengon, ia program-na Meghalaya sorkari, gong kror 150-mangko World Bank-oniko man·na sienga aro ia program-ara bi·sarangna chonengmitingonin dingtang dingtang kamrangni gimin skie on·anichi a·doko namroro silroroaniko ra·bana ja·ku deani ong·enga ine a·dokni Chief Minister parakataha.