TURA: Mask ba ku·mittiprangko ganani bidingo Meghalaya sorkarini Health & Family Welfare Department-oni u·iataniko man·ahani gimin aro India a·songni bang·bata biaprangon, COVID-19-ni Omicron rokom giproroengahani gimin West Garo Hills a·jaoba mask-rangko ganchina gita West Garo Hills a·jani Deputy Commissioner Ram Singh, mikrakataniko on·angaha.
Deputy Commissioner-ni parakatani gitade, ia kenbegnigipa sajinmako mask-rangko gananichisan an·tangtangko aro sakgipinkoba naljoke rakkiani chol ong·engani gimin ia kenbegnigipa sajinma sabisioniko an·tangtangko naljoke rakkina gita mitapgittam dake tarigimin N-95 ba cotton mask-rangko ganna nangchongmotenga.
Plastic ba bigilrangoni ba·e tarigimin mask-rangkode ganjachina gita didiangengon, iandakgipa mask-rangko gananichide an·tangtangko aro sakgipinrangkoba naljoke rakkina man·jawa ine Deputy Commissioner, ba·ra ba cotton-chi mitapgittam dake tarigimin mask-rangkosa ganchina u·iataha.
Mask-rangko ganengon, an·tangtangko aro saksa sakgipinko naljoke rakkina man·na gita ku·dipeosan ba gingting nakatate ganjachina aro gingting ku·sik gimikkon man·gope ganchina gita DC u·iataha.
A·palrangchi ong·katrongenggipa manderangkode noktangtangoba aro mongsongbate saa ding·a donggipa nokdangrangoba ganchina gita DC u·iataha.
