Damberangko tikka su·anio Meghalaya ja·manchakenga

New Delhi: Damberangko tikka su·anio namen ja·manchakengani gimin, tikka su·aniko dingchikbatatchina aroba gong·rakbatatchina gita National Commission for Protection of Child Rights (NCPCR), Meghalaya-ko didiaha.
Damberangko COVID tikka su·na a·dokni kam ka·anirang chu·ongja, jemangan ia sabisina namen kenchakna nangani obostao ga·akenga ine NCPCR aganaha. Simsakgijanichi uamangni janggirangko kenchakaniona sokatenga ineba mikrakatjolaha.
Damberangko COVID tikka su·anio ja·man chakbatenggipa Meghalaya, Nagaland, Manipur aro Punjab ia a·dok dambrini Chief Secretary-rangna, damberangko COVID tikka su·aniko ta·rakbatatchina gita didianiko on·e  NCPCR chittirangko seataha. Data-o gita damberangko COVID tikka su·anio ia dambri a·dokrangan ja·man chakbatengani gimin child rights body, ia dambri a·dokrangna chittirangko seataha ine NCPCR koboro parakaha.
Co-WIN-ni data-o segatgiminrangko commission nisusaaha aro koborna parakatani gita damberangko COVID tikka su·ani Punjab-o 1.3 per cent-san ong·engkua, uamangni ja·man Meghalaya-o 1.9 per cent, Manipur-o 2.0 per cent aro Nagaland-ode 0.6 per cent-san ong·engkua.“A·songo chadamberangko COVID tikka su·ani data-ko gipin a·dokrang baksa tosusae nion, chadamberangko tikka su·na ia dambri a·dokrangni kam ka·anirang chu·ongja ineba Commission nikrikaha. Unigimin chadamberangko tikka su·na rakgipa cholrangko dakchina gita commission, na·simangko mol·molatenga” ine Commission, a·dokrangna uamangni seatgipa chittio janapataha.
Bilsi 15-17-ni gisepogipa chadamberangni Co-WIN app-o biming segatgiparang 2,18,28,650 gapaha aro bilsi 15-18 ong·gipa Indiani chadamberang jemangan skanggipa tikkarangko su·ahachim, uamangara da·o dipet 22.7 percent gapaha. Da·o dipet tikka su·gimin chadamberang 2,00,91,496 gapangaha.
A·songo COVID man·giparang bang·rikrikbataiengon, aroba batninggipa Omicron sabisi giproroengon, sabisini giproroaniko champengna aro komiatna gita Meghalaya-ko man·chape gipin damchet a·dok aro UT-rangko, test ka·aniko bang·batatchina gita Ma·mong didiataniko on·aha. Test ka·anirang komiode sabisi giproroaniko chu·gimikko ma·sina gita man·jawa ineba Ma·mong Health Ministry-ni Additional Secretary-  Arti Ahuja, chief secretary-rangna seatgipa chittio janapataha. (eom)