SHILLONG: Meghalaya a·dokoba da·al Sombar sal dipet, budepa butchumarang baksana sabisini giproroaniko mikkango donge warachakenggipa manderangna ‘booster dose’ ba dakchakgipa tikarangko su·na a·bachengatgnok.
Health department-ni Principal Secretary Sampath Kumar-ni parakatani gitade, ia skanggipa bako dingtang dingtang saanirang donggipa aro bilsi 60 batgimin manderang baksana mikkango donge sabisini giproroaniko warachakenggipa manderangna ia booster dose-ko su·anggen.
Budepa butchumarangan songsalo bilgribatgiparang ong·ani gimin ia booster dose-ko skanggipa budepa butchumarangna su·chengna sorkari tik ka·aha ineba Kumar parakataha.
Meghalaya a·dokona chu·onga gita tikarang sokbaaha ineba ua tika su·na chol man·enggipa pilak chadamberangkon su·e ra·china gitaba didiataha.
“An·ching pilakan tikarangk aro booster dose-rangkoba ra·na nangchongmota,” ine health official aganaha.
Indake ong·engon, a·doko bilsi 15-oni bilsi 18 ong·gipa chadamberangna tika su·aniko mikkang antigni ba anti gittamni gisepon matchotatna gita sorkari miksongenga ineba Health department-ni Principal Secretary parakataha.
Chadamberangna tikarangko su·ani bidingo sorkari, Education department baksa agangrikenga ine janapatengon, chadamberangna skul aro college-rango tikarangko su·e on·genchimode chatro chatrirangna altubatgen aro kamrangba ta·rakbatgen ine Kumar parakataha.