SHILLONG: Meghalaya a·dokoba COVID-19-ni Omicron rokomko man·giparang dongahaoba da·o dipet sorkari, lockdown-ko ra·gatani bidingo chanchia dongkuja indiba obostarang namjabatanggenchimode lockdown-ko ra·gatani bidingo chanchina nangao ga·akgen ine Sombar salo, a·dokni Chief Minister Conrad Sangma parakataha.
Sombar salo Cabinet tom·a matchotani ja·mano kobor ra·timgipa manderang baksa agangrikengon, batanggimin bilsirangoba lockdown-ko ra·gatani a·sel a·doko songdongenggipa manderang aro sorkarini gitaba neng·nikanirangko chagrongna nangahani gimin janggi tanganio neng·nikanirang dongjana gita sorkari, da·o dipet lockdown-ko ra·gatani bidingo chanchia dongkujaenga ine Chief Minister parakataha.
Meghalaya a·doko COVID man·giparang batroroanggenchimode aro obostarang namjabatroroanggenchimode lockdown-ko ra·gatani bidingo sorkari chanchina nanggen ine janapatengon, a·doko lockdown-rangko ra·gatna nangjana gitasa da·onin sorkari, sabisini giproroaniko champengna raken kamko ka·enga aro manderangkoba niamrangko ja·rikchina didirongengachim ine Sangma aganaha.
A·doko da·o dipet batanggimin changrango gitade COVID man·giparangko hospital-rango donna nangkujaenga ineba Chief Minister aganaha.
“Meghalaya a·doko da·o dipet COVID-19-ni Delta ba Omicron man·gipa manderangko hospital-rango inditana admit ka·a dongkujaenga aro hospital-rango chu·onga gita palangrang donga,” ine Sangma aganaha.
Chol man·enggipa manderang pilakkon tika su·e ra·china aro COVID-na dongimin dingtang dingtang niamrangko raken ja·rikchina gitaba Chief Minister didiataha.
“Tikarangko su·e ra·anichi aro an·ching an·tangtangni namgnina dongimin niamrangko ja·rikanichisa an·ching an·tangtangko aro an·tangtangni nokdangrangko ia kenbegnigipa sabisioniko naljoke rakkina man·gen,” ine Sangma aganaha.
Sombar sal dipet a·bachengatgipa booster dose-ko on·ani bidingo janapatskaengon, da·o dipet ma·manti saanirang gnang bilsi 60 batgimin manderangna aro mikkango donge COVID-ko warachakenggipa manderangna booster dose-ko a·bachengataha aro bakan gipinrangnaba ia booster dose-ko a·bachengatgen ine Chief Minister parakataha.
A·doko tika su·ani 70 percent-na bataha ine parakatengon, ia sal somoirango a·dokni pilak biaprangon election-ni bewalo tikarangko su·engani gimin bang·bata manderangko su·na man·na gita sorkari ka·dongenga ine Chief Minister parakataha.