SHILLONG: Meghalaya a·dokni dam 843 adhoc upper primary skulrangko deficit-ni gadangona ra·dochina dabienggipani bidingo agangrikna okamchina gita Federation of All School Teachers of Meghalaya (FASTOM), a·dokni Chief Minister Conrad Sangma-ko didiataha.
“Adhoc UP skulrangko deficit-ni gadangona ra·dochina chingni dabienggipani bidingo agangrikna gita ia jani gisepon chingko okamchina chinga chief minister-ko didienga. Ia jani gisepo ua chingko okamjagenchimode chinga an·tangtangni gita ja·kurangko de·anggen,” ine FASTOM-ni president Kenneth Shadap, kobor ra·timgiparangna aganaha.
Shadap-ni parakatani gitade, a·dokni pilak adhoc upper primary skulrangkon uni sorkari, deficit-ni gadangona ra·doatgen ine chief minister an·tangan, 2018 bilsini July 27 tariko skigiparangni Asanang-o tom·bimonganio ku·rachakaniko on·ahachim.
Adhoc UP skulrangko deficit-ni gadangona ra·doatchina dabianiko sorkari knachakjaengani gimin adita salrangna skangsan adhoc UP skulrango skigiparang, Shillong songjinmao asonge jingjengatanikoba dakangahachim ine nikna man·a.
A·dokni adhoc UP skulrangko deficit skulni gadangona ra·doatna proposal-ko on·ani bidingo 2019 bilsini March 18 tarikon School Education & Literacy-ni deputy director-ba pilak sub-divisional school education officer-rangna u·iataniko on·ahachim ineba FASTOM-ni president parakataha.
An·tangtangni ku·rachakgiminko chu·sokatjaengani gimin a·dok sorkariko jegalatengon, “Ia MDA sorkariara manderangna kam ka·gipa sorkari ong·ja indiba politician aro bading chiwalgiparangni sorkarisa ong·a,” ine Shadap matnangataha.
SSA skulrango bariata gita Mid Day Meal-ni cook-rangna dormahako gong 1000-oniko gong 3000-ona bariatchina gitaba FASTOM dabiangaha.