TURA: Chokpot songona dakanggipa rama jal·langrang namsrangjaengahani a·sel songni nokni manderang neng·nikanirangko chagrongna nangtokengani gimin ia ramako ta·raken tarie on·china didie re·anggipa Sonibar salo Garoland State Movement Committee (GSMC)-ni dilgiparang, a·dokni Chief Minister Conrad Sangma-ko gronge memorandum-ko on·ataha.
Chokpot jolrango rama jal·langrang namsrangjaengahani a·sel wachini somoirango neng·nikanirangko chagrongna nangbatenga ine ia rama jal·langrangni bidingo sorkari baksa agangrikchina aro rama jal·langrangko tarie on·na didichina songni nokni manderang aganatahani gimin GSMC-ni a·dokni Chief Minister-na memorandum-ko on·ataha ine GSMC-ni assistant general secretary Cyril Sangma parakataha.
GSMC-ni parakatani gitade, Chokpot jolo donggipa dingtang dingtang songrang aro mongsongbate Dadinggre, Chandigre, Darinanggre, Sabiagre, Boldamgre, Wategre, Rongta Ku.sik, Dompai aro Dendamgre songni rama jal·langrang namsrangjahani a·sel wachini somoirangode ia songrango donggipa manderang re·a doanirango namen neng·nikanirangko man·batna nangengachim.
