SHILLONG: Meghalaya a·dokko dilenggipa manderangoni mitamrang, an·tangtangan COVID-ni niamrangko pe·engani a·sel manderangni gisepo jajaataniko man·tokenga ine Mylliem-ni MDC Ronnie V Lyngdoh matnangataha.
“Dilgiparang an·tangtangan COVID-ni niamrangko ja·rikchinaba aganenga aro basakoba ia apsan dilgiparangan niamrangkoba pe·e manderangko jajaattokenga. Sabisini giproroaniko champenganio dilgiparang an·tangtangan niamrangko manie mesokdilna nanga,” ine Lyngdoh aganaha.
Lyngdoh-ni aganani gitade, manderang tikako su·na jechaktokengoba sorkari aro mitam dilgiparangkon iana dos galna nanga maina sorkariko dilgiparang aro mitam dilgiparang an·tangtangan niamrangko ja·riktokjaenga aro mask-rangko gangija skatang re·ruratokenga.
“Niamko donengon, uan pilaknan apsan niam ong·na nanga aro darangba ia niamni kosako ong·na man·ja. Coronavirus sabisiara namen kenbegnigipa sabisi ong·a ine aganeba, dilgiparangko maming mask gri aro niamrangko ja·rikjaenga ine nikgenchimode uan manderangni gisiko jajaataniko ong·ata,” ine Mylliem MDC aganaha.
A·doko COVID man·giparang batrorobataiengoba ia sabisi bidingo dingtangesa aganengani giminba ua an·tangni suk ong·gijaniko parakataha.
“An·chingni a·doko manderang hospital-rango sannaniko ra·engoba mitamde siangna gita nangtokenga indiba maini gimin da·o ia sabisiko inditana sagipa ong·ja ine aganskaenga anga ma·sija. Sabiside sabisian ong·aigen aro darangba ia sabisiko nom·gipa ine aganna man·jawa,” ine Lyngdoh aganaha.
Manderangko naljoke rakkina gita ia sabisini bidingo awareness program-rangko ong·ate mikrakatanirangko on·chinaba ua health department-ko didiangaha.
“Mask-rangko ganbo, saksa sakgipinoni chel·tanggrike dongoba ine u·i-ma·sigipa manderangan aganenga ong·ode uko dakbo maina an·chingo curfew ba lockdown-rangko ra·gatanichide ia neng·nikaniko namatna man·jawa,” ine ua aganaha.