SHILLONG: Sonibar saloni Robibar salona konta 24-ni gisepo Meghalaya a·dok gimiko sak 211 manderang COVID-19 man·daptaiaha indiba ia konta 24-ni gisepo a·dok gimikon COVID man·e sigiparangde dongskajaha.
Konta 24-ni gisepo COVID-19 man·dapgipa sak 211 manderangko channe da·o Meghalaya a·dok gimiko COVID-19 man·e dongenggiparang gimik sak 1128 gapdoangaha.
Konta 24-ni gisepo COVID man·gipa sak 211 manderangoni, sak 1-de East Garo Hills-o, sak 14-de East Jaintia Hills-o, sak 163-de East Khasi Hills-o, sak 2-de North Garo Hills-o, sak 4-de Ri Bhoi a·jao, sak 1-de South West Garo Hills-o, sak 18-de West Garo Hills-o, sak 5-de West Jaintia Hills-o aro sak 3-de West Khasi Hills a·jao ong·a.
Ia apsan salon gimik sak 74 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 83,740 gapskaengaha.
Da·o dipet Meghalaya a·doko COVID-19 man·e sianggiparang gimik 1490 gapengaha.