SHILLONG: Niam gri koela badinganichi badiaba badiaba manderangko man·e cha·atna gita NPP-chi dilenggipa MDA sorkari, mitam department-rangko rim·kepe donenga ine Mendipathar-ni All India Trinamool Congress (AITC) MLA Marthon Sangma matnangataha.
A·doko niam gri koelarangko badingengoba sorkari maming ja·kurangko de·na gisiko nangjaenga ine AITC-ni dilgipa Mukul Sangma-ni matnangatani ja·man, Mendipathar-ni MLA-ba MDA sorkariko matnangataha.
“Niam gri koela badingna gita ia sorkari, North Garo Hills a·jani Dainadubi aro South Garo Hills a·jani Gasuapara-o donggipa DMR aro Transport department-rangko rim·kepaha aro ia department-ni official-rangko uamang nangchongmotgipa lekkarangko am·sandina gitaba on·jaenga,” ine Sangma parakataha.
Niam gri koela bikotani aro salruraani bidingo MDC-rang, NGO-rang aro jolo songdongenggipa manderang changni chang sorkarina badi ka·doengoba maming am·sandianirangko dakjaenga ineba Mendipathar MLA matnangataha.
“Iandake niam gri kamrangko ka·aniara a·dokna namen namgijani ong·enga. Kamrangko nirokna dongipa department-rangan kam ka·na man·jaenga ong·ode ia department-rangko bon·atsrangon nambata,” ine Sangma aganenba, bilsignina skangba Dainadubi-o apsan dakgipa obostako nikna man·aha aro a·dokni tangka paisarangko cha·ugiparang ia tangka paisarangko on·piljaha ine matnangataha.
Assam a·dokoniko koela salbana gita jakkalenggipa e-way bill-rangni gimin janapatengon, Bangladesh a·songona salangenggipa koelarangara Assam-oni ong·ja indiba Garo Hills-ni koelarangan ong·a ine AITC-ni MLA matnangataha.
“Anga an·tangan Dainadubi jolo donggipa Mendipathar-ni MLA ong·e iako namen ma·sia maina Bangladesh-ona salangenggipa koelarang kg-saba Assam-oni ong·ja. Ia koelarangara Meghalaya a·dokni koelarangan ong·genchimoba Meghalaya a·dokde ia koelarangni maming kajinarangko man·jaenga indide ia sorkari maikai iandakgipa kamrangko ka·na man·enga. Ia koelarangna GST-koba Assam-nasa gamskaenga,” ine Sangma parakataha.
Meghalaya a·doko skigiparang, GHADC-o kam ka·giparang aro gipinrangba an·tangtangni man·na nangkuenggipa dormaharangkon man·tokjaengoba iandake kajina gimaataniko champengna sorkari gisiko nangjaenga ineba AITC-ni MLA, suk ong·gijaniko parakataha.