Shillong: Meghalaya, Robibar salo sak 318 covid sagiparangko man·dapaha, Sonibar salna sak 88 komibata. A·doko covid saa man·giparang chu·gimik sak 88,459-ona ga·doangaha ine health department-ni a·gipi official koborna u·iataha.
Health Services Director Dr Aman War-ni koborna u·iatani gita, Robibar salo saksa covid saa man·e siaha, indake a·doko covid saa man·e sigipa chu·gimik sak 1,497 gapaha. Sak 318 covid saa man·dapgiparangoni sak 201 East Khasi Hill district-oni ong·a. West Garo Hills District-oni sak (70) , Ri Bhoi District (24), South West Garo Hills District (8), West Jaintia Hills District (6), Eastern West Khasi Hills District(3), aro South West Khasi Hills, West Khasi Hills District-oni sakgniprak, East Jaintia Hills aro South Garo Hills District-oni sakprak ong·a.
A·doko covid saa man·e donggiparang sak 2,121 dongenga. Robibar salo sak 198 covid sagiparang saa nampilenba saa nampilgipa chu·gimikde sak 84,841 gapaha. Da·odipet a·doko lak 13.03 sample-ko covid porikka ra·aha. Aro lak 22.63 manderang covid tikako su·tokaha ineba Health Service Director Dr War, koborna u·iataha.