RESUBELPARA: North Garo Hills a·jani chadamberangna kam ka·e cha·ani cholrangko on·na miksonganio Project SEEL-ko adita salrangna skang, North Garo Hills a·jani Resubelpara Circuit House-o a·bachengate on·angaha.
Ia Project SEEL (Skill, Entrepreneurship, Employment & Livelihood)-ara chadamberangna jakni kamrangko skie on·na, bading chiwale cha·ani cholrangko on·na, kam ka·e cha·ani cholrangko on·na aro janggi tangani cholrangko on·na gita District Skill Committee baksana North Garo Hills District Administration-ni a·bachengatgipa program ong·a.
Ia project SEEL-ko a·bachengate on·angani somoio Meghalaya Legislative Assembly-ni Deputy Speaker aro Resubelpara-ni MLA TD Shira, jinmana aganprakengon, dingtang dingtang cholrangni bidingo manderangna u·iatskana gita ia project, songni nokni village employment council (VEC), self help group (SHG) aro sorkarini ning·o bikotgipa Producers Group-rangko jakkalanggen ine parakataha.
Ia project-ara, sorkarini dingtang dingtang program-ni ning·o beneficiary-rangko seokna namgipa ja·ku de·ani ong·gen ineba ua aganaha.
Ia program-ni bidingo manderangna social media gita nambate u·iatna miksonganio dingtangmancha www.facebook.com/seelngh link-koba oprake on·angjolaha aro ia social media link gita, kam ka·anio aro bading chiwalanio chu·sokgipa manderangni golporangko jinmana parakatgen.
Ia project-ko a·bachengate on·angani somoio dongpae bakko ra·anggipa gipin manderangara, Kharkutta-ni MLA Rupert Momin, Bajengdoba-ni MLA Pongseng Marak, North Garo Hills a·jani Deputy Commissioner RP Marak, ADC ZJ Sangma aro dingtang dingtang department-ni officer-rang ong·a.