SHILLONG: Re·anggipa Robibar waljatchio, South West Khasi Hills a·jani Bagli LCs Point-o donggipa dokkan danbriko wa·al kamgopaha indiba rasong gnange wa·al kamanio darangba saknaanirangko man·jaha ine kobor on·aha.
Ia dokkanranga, damgnide galamal aro damgnide garini bosturangko palgipa dokkanrang ong·achim aro dokkan dambrini nokgiparangara, Majisora-ni Talish D Marak, Majisora-ni Binat Sangma, Majisora-ni Lipin D Marak aro Bagligre-ni Binet Sangma ong·achim.
Koborko on·ani gitade, ia dokkanrangko walni 12:00 bajimango wa·al kamaha indiba maikai wa·al kamchakatahachim, darangba a·selko ma·sikujaenga.
Indake ong·engon, wa·al kamgipa dokkanrangko ta·raken niechina aro noksan ong·atako man·gipa dokkan nokgiparangna nanga gita dakchakanirangko on·china All Khasi Hills A·chik Federation (AKHAF)-ni president Clivestar Ch Marak, a·dok sorkariko aro district official-rangko didiataha.