TURA: Meghalaya a·doko niam gri koelarangko bikote salrurana on·enga ine dingtang dingtang dolrang matnangtokengon, a·doko aro mongsongbate Garo Hills-ni koela a·damrango niam gri koela badinganiko East Garo Hills a·jani Niksamso A·chik Society (NAS) dolba raken jegalataha.
NAS dolni parakatani gitade, Meghalaya a·doko niam gri koela bikotaniko champengatani ja·manoba dingtang dingtang koela a·damrango gipin biaprangoni manderangsa re·bae koelarangko badingna cholko man·skaengachim.
“A·doko niam gri koela badinganiko champengchina dingtang dingtang NGO-rang aro opposition dolrangba sorkariko didiengachim indiba da·alona kingkingan koela a·damrango maming champengani gri skatang koela badinganiko nikna man·enga. Iandake niam gri koela badinganiko champengjaengani a·selan a·doko songdongenggipa manderang noksan ong·atako man·skana nangenga,” ine NAS-ni president Tengrak Marak parakataha.
A·doko koela badingna on·enga ong·ode joltangni manderangba apsan cholrangko man·na gita ta·raken koela bikotna on·na nanga ong·jaode niam gri koela bikotaniko chu·gimik champengsrangna nanga ineba NAS dabiangaha.
A·doko niam gri koela badinganiko champengchina dabianiko sorkari knachakjaenga ong·ode mikkangchi NAS-ni membor-rang, mande jinma aro media baksa koela a·damrangona re·ange am·sandianirangko dakna draatako man·gen ineba NAS-ni president mikrakataniko on·angaha.