SHILLONG: National People’s Party (NPP)-chi dilenggipa Meghalaya Democratic Alliance (MDA) sorkario bakrimegipa Congress dolni sakbonga MLA-rangna biapko on·na gita da·o dipet Cabinet-ko sualpila dongkujawa ine a·dokni Chief Minister Conrad K Sangma parakatenba, Congress MLA-rangna kamrangko on·ani bidingo sorkari chanchipiltaina nangkugen ine talataniko on·angaha.
Meghalaya a·dokni sakbonga Congress MLA-rang, AICC ba MPCC baksa agangrikchenggija re·anggipa Mongolbar salo, MDA sorkario bakrimeahachim ine nikna man·a. MDA sorkario BJP dolba bak ong·skaengachim.
Meghalaya a·doko Congress Legislature Party (CLP)-ba NPP-chi dilenggipa MDA sorkario bakrimna gita Mongolbar salosan a·dokni Chief Minister Conrad K Sangma-na chittiko on·eahachim aro ia chittio CLP-ni dilgipa Ampareen Lyngdoh baksana Congress dolni gipin MLA-rang, chong·motan Mayralborn Syiem, Mohendro Rapsang, Kimfa Marbaniang aro PT Sawkmie-ba soi ka·ahachim.
Indake ong·engon, Congress MLA-rangni MDA-o bakrimeanichi maming meligrikgijanirang dongjana gita ua BJP dolni dilgiparang baksa agangrikgen ineba Chief Minister parakataha.
“Uamang a·dokni nangchongmotgipa kamrango sorkariko dakchakna gitasa MDA-o bakrimeaha ine an·ching ma·sichakna nanggen. Anga bebera·a uamangni bakrimeanichi MDA-o bakrimenggipa dingtang dingtang dolrangni gisepo maming nangchakeani dongjawa,” ine Sangma aganaha.
MDA-o dingtang dingtang dolrang nangrime kamko ka·anichi a·dokni nangchongmotgipa kamrangko chu·sokatna man·gen ineba Sangma, an·tangni ka·dongchakenganiko parakataha.
Congress dolni MLA-rangko MDA-o rimnapahani gimin BJP dolni suk ong·jaengani bidingo sing·on, ua BJP-ni dilgiparang baksa agangrike ia meligrikgijaniko namatna jotton ka·gen ine Chief Minister parakataha.
MDA sorkario dingtang dingtang dolrang apsan nangrime kamko ka·anichi simarango meligrikgijani, HNLC bobil dol baksa agangrikani aro uandakgipa dingtang dingtang kamrangko chu·sokatna man·gen ineba ua aganaha.
AITC-koba sorkario rimnapaigenma ine sing·skaon, “Iade uamangni skaniosa. Uamang chingna seate nichina aro chinga maiko dakna man·a uko nigen,” ine Sangma aganaha.