TURA: South Garo Hills a·jao aro mongsongbate Nengkong jolrango aiao inmanbegipa biaprang donge tourism-ko tang·doatna cholrang bang·en donggenchimoba mamingni gitan namroro silroroani dongjaengani a·sel ia biaprang tang·dopana man·jaenga ine Garo Students Union (GSU) Karukol regional unit parakatenba, ia jolrango pilakni gitan namroro silroroaniko ra·bachina a·dokni Chief Minister Conrad Sangma-ko didiataha.
GSU Karukol regional unit-ni president AZ Matsram N Marak-ni parakatani gitade, da·o dipet Nengkong jolo primary health sub-centre damsasan dongani a·sel manderangna an·seng baljokaniko on·anio kamrangko name ka·na man·jaenga aro ia sub-centre-o sanna banani cholrangba namen komian baksana kamko ka·enggipa nurse-ba saksasan ong·e neng·nikanirangko chagrongna nangenga. Uandaken ia primary health sub-centre-o palangrangko bariate, ambulance-rang aro pharmacy-ko on·e ia sub-centre-ko tang·doatchina gita GSU, sorkariko didiataha.
Nengkong jolo tourism-ko tang·doatna nangengani gimin janapatengon, ia jolo Te·tengkol, Matchakol, Balwakol, Dikkakol, hot spring aro uandakgipa dingtang dingtang biaprang, tourist-rangko salbana donga indiba ia jolrango tourist-rangna dongchakani biaprang dongkujani a·selan gipin biaprangoni manderang re·bana neng·niktokenga ine GSU Karukol unit-ni president parakatenba, ia jolrangona re·baenggipa manderangko sokachakna gita Tourist lodge damsako on·china Chief Minister-ko didiataha.
Ia jolrango donggipa rama jal·langrangni gimin janapatskaengon, da·alona kingkingan Chibegre aro Jantagre songrangonade ramarangan dongkujaengani a·sel songni nokni manderang hanging bridge ba dingdee kagipa jal·lang gitasa re·ruratokna nangenga ine GSU Karukol unit parakatenba, Nengkong bazar-oni ia songrangona RCC dolong baksana ramarangko tarie on·china gita Chief Minister-ko didiataha. Nengkong-oni Te·tengkol-ona ramako tarie on·genchimode ia biapona gipin biaprangoni bang·bata manderangan re·batoknaba gnangchim ineba Marak parakataha.
Nengkong songo mini stadium-ko rike on·china aro jolo songdongenggipa manderangni naljokanina Nengkong-o police outpost-ko songe on·china gitaba GSU Karukol regional unit, a·dokni Chief Minister-ko didiataha.