FOCUS program-ni ning·o Chokpot jolni dol 170 PG-rangna kr 1.2 tangkarangko sualata

TURA: Sukrobar salo, a·dokni Chief Minister Conrad K Sangma, South Garo Hills a·jani Chokpot-ona re·angenba, Farmers Collectivisation for Upscaling Production & Marketing System (FOCUS) program-ni ning·o dingtangmancha game ge·e cha·giparangb baksa tom·aniko ong·atangaha aro ia tom·anio ua, game ge·e cha·giparangni bikotgipa dol 170 producers group (PG)-rangna gong kror 1.2-ni cheque-rangko suale on·angaha.
Game ge·e cha·enggipa manderangna ra·gatgipa ia  FOCUS program-na sorkari, gong kror 200 tangkarangko chame donahachim aro batanggimin somoirango, a·dokni Chief Minister, dingtang dingtang biaprangona re·ange producers group-rangna, self help group (SHG)-rangna aro cooperative society-rangna gong kror 50-na baten tangka paisarangko suale on·ahachim.
Chokpot-o game ge·e cha·enggipa manderang baksa tom·anio a·dokni Chief Minister, jinmana aganprakangengon, ia FOCUS program-ni ning·o a·dok gimikni lak 4.5-na baten game ge·e cha·enggipa manderang namgniko man·gen ine parakangaha.
Ia FOCUS program-ni ning·o game ge·e cha·enggiparangko ‘Producers Group’-rango dol dakatenba, dolni membor sakpraknan sorkari, gong 5000/- ka·e tangka paisarangko dakchake on·engachim.
COVID-19 giproroahani a·sel game ge·e cha·enggipa manderang janggi tanganio neng·nikanirangko man·na nangahani gimin game ge·e cha·enggipa manderangna dakchakaniko on·na gita sorkari ia program-ko ra·gataha ineba Chief Minister, ia tom·anio jinmana parakataha.
Chokpot jolrango, Chokpot Water Supply, Guest House, Civil Sub-Division-ni gital building aro Baromile-oni Chokpot-ona ramarangko man·chape dingtang dingtang namroro silroroani kamrangna sorkari, gong kror 100-na baten tangka paisarangko chamataha ineba Chief Minister parakataha.
Ia apsan somoi aro biapon ua dingtangmancha self help group (SHG) Mela-koba ong·ate dingtang dingtang SHG-rangna gong kror 1-ni cheque-rangko suale on·angjolaha.