SHILLONG: Khasi Hills jolrango bobil dake chakatenggipa Hynniewtrep National Liberation Council (HNLC) dol, tom·tomaona re·bapilna gita sorkari baksa agangrikna nangnikenganiko seachi u·iatmanahani gimin, bobil dol baksa agangrikaniko a·bachengatna gita Budbar salo, Meghalaya a·dokni Chief Minister Conrad K Sangma, ma·mong sorkarini ning·o donggipa Ministry of Home Affairs (MHA)-ni Home Secretary-ko New Delhi-o grongeaha.
New Delhi-o kobor ra·timgipa manderang baksa agangrikengon, HNLC bobil dol baksa agangrikaniko Meghalaya sorkari, chu·sokgipa ong·atna nangnikenga aro bobil dol baksa agangrikaniko a·bachengatna gita ua Ministry of Home Affairs baksa agangrikna Delhi-ona re·baaha ine a·dokni Chief Minister Conrad Sangma parakataha.
Chief Minister-ni parakatani gitade, a·doko bobil dake chakatenggipa HNLC dol, tom·tomaona re·bapilna nangnike, ma·mong sorkari baksa agangrikna tariani bidingo sorkarina seachi u·iatahani gimin ia kamko a·bachengatna gita ua Ministry of Home Affairs baksa agangrikna Delhi-ona re·angaha.
“Uamang maming niamrangko dongija, Constitution-o pangchaken sorkari baksa agangrikna nangnikaniko chingna seachi u·iatmanaha aro ia kamko ta·raken a·bachengatna nangnikengani gimin anga ma·mong sorkari baksa agangrikna re·baaha,” ine Sangma aganaha.
HNLC bobil dol baksa agangrikna a·dok sorkari ku·baltitimgipako seokna kamrangko ka·engaha aro iana adita sak manderangni bimingrangko sandie donmanaha ineba Chief Minister parakataha.
Re·anggipa February-ni 9 tarikon HNLC bobil dol, sorkari baksa agangrikna tariani bidingo seachi sorkarina u·iatahachim.