TURA: Garo Hills Autonomous District Council (GHADC)-ni gital chief executive membor (CEM) Rakesh Sangma-ko ra·galpilchina gita dabie so·sojengjeng ong·aniko namatna sorkarini agangrikna okamenganiko NGO-rangba ra·chakangaha.
GHADC-ni gital CEM-ko ra·galpilchina dabie jingjengatani a·sel GHADC-ni kamrangko ka·na man·jaengani gimin ia neng·nikaniko bon·atna man·na gita Sombar attamo apsan agangrikna ine Robibar salo West Garo Hills a·jani Deputy Commissioner, dingtang dingtang NGO-ni dilgiparangna seachi u·iatahachim.
Ia tom·aniko Sombar attamni 5:00 bajio Tura Circuit House-o ong·atna gita Deputy Commissioner, ADE-ni president Dalseng Bira Ch Momin, GSU-CEC-ni president Tengsak G Momin, FKJGP Garo Hills Zone-ni president Pritam Marak, AYWO-ni president Sengbath Chambugong, AHAM-ni president Georgeprince Ch Momin, FAF-ni president Brinbal M Sangma, NESO-ni assistant general secretary Manseng A Sangma aro NAS-ni president Tengrak R Marak-na seachi u·iatahachim.
Iani bidingo NGO-ni dilgiparango sing·sandiaton, uamang tom·anio bakko ra·na kusi ong·enga indiba uamangni CEM-ko ra·galpilchina dabianikode ra·pilkujawa ine parakattokaha.
“GHADC-ni CEM Rakesh Sangma-ko ra·galchina dabienggipani bidingo sorkari aro district administration maiko aganna uko nina gita chinga tom·anio dongpae bakko ra·anggen. Je obostaba ong·china chinga CEM Rakesh Sangma-ko ra·galchina dabianikode ra·pilskajawa,” ine Robibar attamo FKJGP Garo Hills Zone-ni president Pritam Marak, kobor ra·timgiparangna parakataha.
Koborko on·ani gitade, ia tom·anio sorkarichipakni North Tura-ni MLA Thomas A Sangma aro gipin MLA-rangba bakko ra·angna gita sienga.