GHADC-ni CEM-ko ra·galchina dabie SGH-o ‘vehicle rally’-ko ong·atenga

Tura-o GHADC office-ko picketing ka·angkuenga

By U'IATTIMGIPAONI On Feb 21, 2022

GHADC-ni gital CEM Rakesh Sangma-ko ra·galpilchina dabie manderang GHADC office-ko kam ka·na on·gija jingjengatenga.

TURA: Garo Hills Autonomous District Council (GHADC)-ni gital chief executive membor (CEM) Rakesh Sangma-ko ra·galpilchina gita dabie South Garo Hills a·jaoba dingtang dingtang dolrang, da·al Sombar salni bako vehicle rally ba gari gorarangni re·jomaniko Baghmara-o ong·atenga.

NGO-rangni u·iatani gitade, ia vehicle rally-ko da·al Sombar salni 1:00 bajio Baghmara Government Higher Secondary School kal·chakramoni a·bachengatgen aro Baghmara-ni pilak biaprangonan jinma re·jomanggen.

GHADC-ni gital CEM-ko ra·galpilchina dabianio bak ra·paaniko mesokna gita pilak manderangkon ia vehicle rally-o bak ra·epachina gitaba South Garo Hills a·jani NGO-rang didiataha.

Indake ong·engon, Tura-oba re·anggipa anti gimik GHADC office-ko kam ka·na on·gija jingjengatahaoba NPP sorkarioni maming aganchakanirangko man·kujaengani gimin da·al Sombar saloni a·bachenge Sukrobar salona kingking apsan daken office picketing-ko ong·attaienga ine NGO-rang u·iataha.

Gital CEM Rakesh Sangma-ra atchiaonin A·chikrangni bewalo janggi tangbagipa mande ong·jagenchimode maikai A·chik jat aro a·songko dilna man·gen ine Garo Hills gimikni manderangan uni CEM ong·aniko raken jegaltokengachim.

Iani bidingo kobor ra·timgiparangna talataniko on·angengon, GHADC-ni gital CEM-ko ra·galani bidingo da·onan NPP sorkarioni aro CEM an·tangba maming aganchakanirang dongkujaengani gimin Sombar saloni a·bachenge Sukrobar salonan GHADC-ko office picketing ka·angkugen aro iani ja·manoba maming aganchakanirang dongjagenchimode jinma apsan chanchirimenba rakbate jingjengatanirangko dakangnaba gnang ine NGO-rang mikrakataniko on·angaha.