TURA: Adita salrangna skang, Kudumbashree National Resource Organisation-ni VEC-CBO Convergence Project-ni ning·o salsani convergence camp-ko Krimkro CLF aro Meghalaya State Rural Livelihood Society nangrime, West Garo Hills a·jani Rongram block-ni ning·o donggipa Tebronggre songo ong·atangaha.
Ia convergence camp-ko songni nokni manderangna dingtang dingtang department-ni ning·o ra·gatgipa scheme-rangko sokate on·na miksonganio ong·ataha aro ia program-ko Rongram block-ni Block Development Officer, bol chararangko ge·anichi a·bachengate on·angaha.
Bol chararangko ge·ani ja·man ia camp-o dongipa dingtang dingtang stall-rangkoba BDO-ni jakchi kulie on·angaha.
Ia salsana ong·atanggipa program-o Aadhar, Labour card, PMBSY/PMJJBY life insurance, budepa butchuma, segri aro be·enni gita cholgri ong·gipa manderangni pension-na biming segatani, Covid-19-ni tikana biming segatani aro be·enni gita indin porikka ra·ani baksana samrangkoba indin suale on·angaha.
