TURA: Garo Hills-o so·sojengjeng ong·anirang dongjana gita Garo Hills Autonomous District Council (GHADC)-ni gital chief executive membor (CEM) Rakesh Sangma-ko ta·raken kamoniko ra·galpilchina ba ua an·tangan kamko watchina gita Tura Garo Senior Citizens Forum (TGSCF)-ba didiataha.
TGSCF-ni parakatani gitade, Rakesh ‘Newar’ Sangma-ra Thakur Newar-ni depante aro Mon Bahadur Newar-ni su·gipa ong·e chonaonin Hindu toromo janggi tangbagipa mandesa ong·achim aro Hindu toromo janggi tangbagipa ong·e ua pagipani chatchi ‘Newar’-kosa man·ani ong·achim.
“Rakesh chonaonin A·chikrangni bewalo janggi tangbagipa ong·jani gimin ‘Sangma’ ma·chongko man·na kraja aro iani giminsa Garo Hills gimikon uni CEM ong·aniko jegaltokenga,” ine TGSCF-ni dilgiparang talataniko on·angenba, maming dal·a a·sel ong·na skangan uko CEM-ni biaponiko ra·galpilna nanga ine a·dokni Chief Minister Conrad K Sangma aro District Council Affairs Minister James PK Sangma-na sedoataha.
GHADC-koa Constitution-ni Sixth Schedule ning·o A·chik Tribal jatnasa on·aha ine janapatengon, GHADC-ko Autonomous Tribal Laws-ni on·gimin bilo pangchake gipin jatrang dilna kraani ong·ja aro A·chikrangsa dilna kragipa ong·a ine TGSCF parakataha.
“Uni gimin A·chik a·songo dal·a a·selrang ong·na skangan Rakesh-ko CEM-ni biaponiko ra·galchina ba ua an·tangan kamko wate on·china chinga didienga,” ine TGSCF-ni dilgiparang parakataha.