EGH-o chatro chatrirangna workshop-ko ong·ata

WILLIAMNAGAR: Meghalaya Police-ni ning·o AB/UB constable-ni kamna porikkako ong·atna siengani gimin East Garo Hills a·jaoba chatro chatrirangko ia porikkana tarisamsoani bak gita re·anggipa Budbar salo, workshop-ko Williamnagar-o ong·atangaha.
Ia workshop-ko Project STAR-ni ning·o ong·atangaha aro ia workshop-ko Williamnagar-ni MLA Marcuise Marak, a·bachengate on·angaha.
Ia workshop-ko ong·atanio Williamnagar-ni wilwilao donggipa dingtang dingtang biaprangoni bang·bea chatro chatrirang re·bae bakko ra·angtokaha aro uamangna East Garo Hills a·jani DSP-rang, chong·motan Victor N Sangma aro Anthony Ch Momin, maikai porikkana an·tangtangko tarisamsona nangachim, uarangni gimin agan-talate on·angaha.