TURA: Garo Hills gimikon jegalanirangko man·tokengani a·sel Garo Hills Autonomous District Council (GHADC)-ni chief executive membor (CEM) Rakesh Sangma, kamtangko watna draataniko man·engahani gimin uni biapo Siju GHADC constituency-ni MDC Albinush Marak-ko gital CEM-na minge donatskaaha ine kobor on·aha.
February ja a·bachengaonin gital CEM Rakesh Sangma-ni kosako jegalanirangko dake Garo Hills gimikni NGO-rang, dingtang dingtang dake jingjengatanirangko daktokengani gimin gital CEM, Sombar salon kamtangko watgnok ine re·anggipa Sukrobar salosan parakatahachim ine nikna man·a.
Indake ong·engon, Sonibar salo gital Executive Committee-ni membor-rang apsan chanchirimenba, Siju-ni MDC Albinush Marak-ko CEM-ni kamna minge donangskaaha ine kobor on·timgiparang parakataha.
CEM-ni kamna mingako man·gipa Albinush Marak, da·o dipet GHADC-ni deputy chairman ong·engachim ine nikna man·a.
Re·anggipa bilsini April jao deputy chairman-ni kamna election-ko ong·atanio ua All India Trinamool Congress (AITC)-ni MDC ong·enggipa Rinaldo K Sangma-ko cheahachim.
Albinush Marak-ko CEM-na biming minganio NPP-chi dilenggipa EC-ni pilak MDC-rangan namnikpaaniko paraktokaha ineba kobor on·aha.
