SGH-o pekatgipa samrang baksa sam badinggiparangko rim·a

TURA: Re·anggipa Sombar salo, South Garo Hills a·jani police-rang, BSF dolni sipairang baksa nangrime, Bangladesh a·songona palsrukatna miksonge donenggipa pekatani samrang baksana sam badinggipa manderangko, Baghmara-ni Malikona joloniko rim·na man·aha.
Police-rangni u·iatani gitade, pekatani samrangko badingenggipa adita sak manderang Bangladesh a·songona palsrukatna gita Baghmara-ni Malikona-ona samrangko ra·angna sienga ine police-rang koborko man·soenba, sam badinggipa manderangoni saksa Merazul Hoque minggipa mandeko Anti Narcotics Task Force (ANTF)-ni sipairang rim·aha aro uko sing·sandion ua sipairangko saksa Babu Das minggipa mandeni nokona rimangaha.
Ia mandeni nokona re·ange am·sandion gitchak gisim dakgipa bag kingsaoniko police-rang, 100 ml-ni te 98 Phensedyl gusu samrangko man·aha. Ia Phensedyl gusu samko manderang an·tangtangko pekatna jakkalrongachim aro ia samko Bangladesh a·songode champengatmanahani gimin dam rake bretokskaengachim.
Indake ong·engon, ia nokoni Usha Das minggipa me·chik saksako me·chik police-rang sing·sandion, ua an·tangni nok janggilchipak gale donatgipa biapona police-rangko rimangskaaha.
Ua biapo man·gipa plastic gipokko police-rang kulie nion, gram 109 ong·gipa rong 1125 WY/YABA/Methaphetamine tablet-rangko man·aha.
Iani bidingo police-rang, pekatani samrangko badingenggipa manderangko rim·e nanga gita mokordomako ka·aha ine u·iataha.