TURA: Garo Hills Autonomous District Council (GHADC)-ni gitcham chief executive membor (CEM) Rakesh Sangma-ko ra·galpilchina dabianio A·chik a·song gimikni manderangan bakrimahani a·sel chu·sokgipa ong·na man·aha ine Bristibar salo, Garoland State Movement Committee (GSMC) Pedaldoba regional unit-ni chairman Rimjen Ch Sangma, mittelpilaniko parakatenba, GHADC-o chu·sokatna nangkuenggipa dingtang dingtang kamrang, jekai Garo Customary Law (GCL), Service Rule, dingtang electoral roll aro uandakgipa kamrangko chu·sokatna dabianioba bakrimaniko on·angkuchina gita Garo Hills gimikni dingtang dingtang dolrangko aro Garo Hills-o songdongenggipa manderangko didiataha.
Sangma-ni parakatani gitade, GHADC-ni gitcham CEM Rakesh Sangma-ko ra·galchina dabianio dingtang dingtang dolrangsan ong·aigija A·chik a·song gimikni manderangan bakrimaniko on·ahani a·selsa chu·sokgipa ong·na man·aha aro February-ni 28 tariko ‘Garo Awakening Day’-koba man·aha.
“A·chik jat mangrakbegipa ku·monganichi February-ni 28 tariko ‘Garo Awakening Day’ ine minggipa salko man·aha aro ian skanggipa manianiba ong·aha. Ia gamchatbegipa bimingko man·aniara A·chikrangni chubatgipa chokkiko gipin jat Rakesh ‘Newar’-na on·ani a·selsa ong·aha maina uko ra·galpilna man·aniara jatni ku·monganiko aro jatni mikrakaniko mesokaniba ong·aha,” ine GSMC Pedaldoba unit-ni chairman parakataha.
Gitcham CEM-ko ra·galchina dabianio A·chik jat sakantian ku·mong nangrime bakko ra·aha ine mittelpilaniko parakatengon, mikkangchiba A·chik jatni nangchongmotenggipa kamrang, jekai GCL, Service Rule, GHADC-na dingtang electoral roll aro uandakgipa gipin kamrangko chu·sokatna A·chik jat gimikan ku·monge kamko ka·angkuna nangenga ine Sangma parakataha.