TURA: Garo Hills Autonomous District Council (GHADC)-ni gitcham chief executive membor (CEM) Rakesh A Sangma-ko High Power Committee (HPC)-ni chairman songahani gimin Sukrobar salo Garo Hills-ni Constitutional Rights Forum (CRF) jegalatenba, ADC (Rules)-ni ning·o HPC-ko songna niam dongama ine sing·doangaha.
Garo Hills gimik jegalako man·ahani gimin adita salrangna skangsan Rakesh Sangma, CEM-ni kamko watahachim aro uni kam watani ja·man uko GHADC-ni gital CEM Albinush Marak, HPC-ni chairman songe on·skaahachim.
Rakesh-ko HPC-ni chairman songahani gimin GHADC-ni CEM Albinush Marak-na sedoatengon, Rakesh Sangma-ko Garo Hills-ni manderang jegaltokahaoba maini gimin uko chairman songe HPC-ko bikotna nangaha ine CRF, talataniko on·china dabiangaha.
“Revenue-ni kamrangna a·dok sorkari baksa agangrikna gitara Revenue-ni executive membor chu·ongjama? Revenue-ni EM in-charge, sorkari baksa agangrikna man·ja ong·ode CEM an·tangan ia kamrangni gimin sorkari baksa agangrikskana man·achim,” ine CRF-ni dilgiparang parakataha.
Gipin autonomous district council (ADC)-rang baksa agangrikaniara CEM-ni kaman ong·achim aro CEM-ni dongjamiting somoioba Deputy CEM dongskaachim ineba CRF parakataha.