EGH-o kg 10-ni Composite LPG cylinder-ko a·bachengate on·anga

TURA: Sombar salo, M/s Jims Flame Gas Agency aro Shira Indane Gramin Vitrak gas agency-rang nangrime, kg 10 ong·gipa Composite LPG cylinder-rangko Williamnagar-ni DRDA Hall-o a·bachengate on·angaha aro ia LPG cylinder-rangko a·bachengate on·angani East Garo Hills a·jani Deputy Commissioner Swapnil Tembe, mongsonggipa sokgipa ong·e bakko ra·angaha.
Ia Composite LPG cylinder-rangko a·bachengate on·anganio IOLC Bngn-II-ni senior sales manager Dorothy Das, ia cylinder-rangni bidingo talataniko on·angengon, ian cheng·ani gimin aro nikprotna man·gipa cylinder ong·e gas-rangkoba nijoljolna man·a aro maram cha·anirangba dongjani gimin da·o manderangni jakkalenggipa silni cylinder-rangna bate jakkaltogipa ong·a ine parakangaha. Security deposit ka·anio adita tangkarangko game, ia composite LPG cylinder-rangko manderang, an·tangtangni da·o jakkalenggipa cylinder baksa te·srenaba man·aigen ineba ua parakataha.
Ia tom·anio East Garo Hills a·jani Deputy Commissioner Swapnil Tembe-ba jinmana aganprakangengon, manderang bolrangko den·e wa·al so·na jakkalna nanggija LPG cylinder-rangko jakkalskachina gita district administration, PMUY 2.0-ni ning·o LPG cylinder-rangko ra·china didina jotton ka·enga ine parakangaha.
Ia tom·anio Deputy Commissioner-ni jakchi, kg 10 ong·gipa gital cylinder-rangko sak 7 gital customer-rangna pakwate on·angjolaha.

Get real time updates directly on your device, subscribe now.

Comments are closed.