TURA: Selsella constituency-o changgittamna kingking MLA ong·anggipa Atul C Marak, re·anggipa Robibar pringo a·gilsakko watangaha aro uni siangani somoio ua bilsi 80 ong·ahachim.
Ua 1983 bilsio Selsella constituency-oni seokako man·chengaha aro uni ja·man joljol changgittamna kingking ia apsan constituency-on MLA ong·angahachim.
2013 bilsioba ua bon·kame Assembly election-o susaahachim indiba ua chango ua INC-ni gitcham MLA Clement Marak-ni jako amako man·skaaha.
1999 bilsio Atul C Marak, Lok Sabha election-oba Tura constituency-oni susaahachim indiba ua PA Sangma-ni jako amako man·rikaha.
Uni changgittamna MLA ong·angani somoio ua a·dok sorkario minister-ba ong·ahachim.
Marak-ni siangani ja·man, a·dokni Chief Minister Conrad K Sangma, Opposition dolni dilgipa Mukul Sangma aro gipin dilgiparangba kalimpaaniko parakataha.