SHILLONG: Meghalayao 0-1 bilsi ong·gipa 92 percent ong·nasipilgipa bi·sarangko biji su·tokaha ine Principal Secretary in-charge of Health, Sampath Kumar mijalo koborna aganaha.
Child Immunisation ba bi·sarangko biji su·anio India gimiko adita bilsirangna skangde 34-gipa gadangrangosa ong·aiachim, indiba 2021 bilsiode bi·sarangko biji su·anio Meghalaya gnigipa gadangona tang·doangaha ine Kumar aganaha.
Indake ong·engon, March 16 tariko National Vaccination Day-o bi·satangtangko rimbaenba biji su·attokchina gita Meghalaya Principal Health Secretary Sampath Kumar ma·gipa pagiparangko didiataha.
“Bi·sarangko biji su·e ra·na gita ian ma·a paarangna nangchongmotgipa ong·a, jean bi·sarangko, uamangni an·sengna man·gijagipa sabisirangoniko chel·chak naljokata,” Kumar aganaha.
Bi·sarangko biji su·ani aro uni namgnirangni bidingo ma·gipa pagiparangna ma·siatna gita miksonge ia National Vaccination Day-ko bilsiantian March 16 tariko manironga. Ia bilsina theme ba pangchakanikoba “Vaccines Work for all” ba biji pilaknan kam ka·a ine donsoaha.
COVID-19 tikkani bidingo aganengon, Meghalayao tikka su·na bilsi gapgiminrang da·o dipet 71 percent su·mantokaha ine Principal Health Secretary aganaha.
Indake ong·genchimoba bilsi 15-17 ong·gipa chadamberangni tikka su·ani namen komienga jeon 21% mangmansan ong·engkua, Health secretary parakaha.
