SHILLONG: Meghalaya a·doko scientific coal mining ba niamo pangchake koela bikotaniko ia bilsini gisepon a·bachengatnaba gnang ine Budbar salo, a·dokni Chief Minister Conrad K Sangma, an·tangni ka·dongchakenganiko parakataha.
Iani bidingo Assembly-ni budget session-o jinmana parakatengon, “Anga Assembly-na ku·rachakanikode on·na man·jawa indiba licence-na dorgasto galgiparangna mining plan-ni approval-ko bakan on·na siengahani gimin jadok ba jachetni gisepon niamo pangchake koela bikotaniko a·bachengna man·naba dongaha,” ine Sangma aganaha.
Assembly-ni budget session-o Nongpoh-ni MLA Mayralborn Syiem-ni sing·anina ua ia kattarangko aganchakaha.
Meghalaya a·doko ian skanggipa changna ong·engani gimin kamrang namen ka·singen ine janapatengon, ian a·a nokgiparangnasan ong·aigija koela bikotgiparangna aro pilaknan skie ra·ani chol ong·gen ine Chief Minister parakataha.
A·bachengo kamrang ka·singenchimoba jensalo manderang niam gita koela bikotanio ranta ong·na a·bachengahaode bang·bata manderangan dorgastorangko galna a·bachenggnok aro unode kajina man·aniba batrorobagnok ineba Chief Minister aganaha.
Chief Minister-ni parakatani gitade, iani bidingo a·dokni dingtang dingtang koela a·damrang donggipa biaprango, koela bikotgiparangna awareness ba mikrakatani program-rangko ong·atahachim.
“Ja·kuantion chinga jakkandilaniko on·enga aro mikkangchiba chinga koela bikotgiparangna skie on·anirangko dakangkugen,” ine ua aganaha.