SHILLONG: Meghalaya a·doko skigiparangni dormaharangko aro chatro chatrirangni scholarship-rangko on·na man·na gita Education department-na tangka paisarangko chu·onga gita on·dapchina Bristibar salo, Opposition All India Trinamool Congress (AITC) dol, a·dok sorkariko didiangaha.
Budget session-ni bon·kamgipa salo, Mawsynram-ni AITC MLA HM Shangpliang-ni a·bachengatgipa chanchirimanio Opposition dolni dilgipa Dr Mukul Sangma-ba bak ra·angpaengon, skigiparangni dormaharangko somoi gita on·na aro chatro chatrirangni scholarship-rangkoba on·na man·na gita Education department-na sorkari tangka paisarangko on·dapna man·achim ine parakataha.
“Chingni sorkariko chalaiengmiting somoion iani bidingo ku·pattianirang dongachim indiba dingtang dingtang a·selrangchi iako dakna man·jaha,” ine Sangma aganaha.
Sangma-ni parakatani gitade, Education department-ni nangchongmotgipa kamrangna jakkalna gita sorkari, adita tangka paisarangko dingtang donna man·gen aro ia tangka paisarangko skigiparangni dormaharangko on·na gitaba jakkalna man·genchim.
A·dokni dingtang dingtang SSA skulrango skigiparang, an·tangtangni dormaharangko somoi gita man·jaengani gimin Shillong-ona re·bae dabina gita nangtokenga aro ian namen kragijani ong·enga ineba ua aganaha.
“2014 bilsiona kingkingde iandakgipa neng·nikanirang dongjachim aro una skangde ma·mong sorkari ta·raken tangka paisarangko watatrongachim. Education department-na tangka paisarangko financial year-ni skanggipa jagittamni gisepon on·atchina an·chinga ma·mong sorkariko didina nangenga,” ine Dr Mukul aganaha.
Meghalaya a·doko bang·bata skulrangan SSA program-ni ning·osa ong·a ineba AITC-ni dilgipa talataniko on·angaha.
Chatro chatrirangni scholarship-na tangka paisarangko watatanio ja·manchakengani giminba ua suk ong·gijaniko parakatengon, ma·mongoni tangka paisarangko watatanio ja·manchakengani a·selan chatro chatrirangni scholarship-ko on·anio a·dok sorkariba ja·manchakna nangenga ine Sangma parakataha.
Sangma-ni agangipa kattarangna aganchakaniko on·angskaengon, SSA skigiparangna agrede gipin gadangni skigiparangnade dormaharangko on·anio a·dok sorkari maming neng·nikanirang dongjaenga ine a·dokni Education Minister Lahkmen Rymbui parakataha.
“Gipin gadangni skigiparang Utilisatiion Certificate (UC)-rangko somoi gita on·enga dipetde chinga uamangni dormaharangko on·anio maming neng·nikani dongjawa,” ine Rymbui talataniko on·angaha.