SHILLONG: Shillong songjinmani Polo-o taridapenggipa JN Stadium-ko Mongolbar salo, a·dokni Sports & Youth Affairs Minister Banteidor Lyngdoh re·ange nieaha.
Ia stadium-ko nieani ja·man kobor ra·timgiparang baksa agangrikengon, ia JN stadium-ko a·dok sorkari, ia bilsini November jaon matchotatna miksongengani gimin kamrangko ta·rakbatatna gita ua ge·etaniko on·aha ine Lyngdoh parakataha.
Sports Minister-ni parakatani gitade, ia JN Stadium-ko taridapna gita sorkari, gong kror 34 tangkarangko chamaha aro ia stadium-o dingtang dingtang kal·susaanirangko sokachakna gita miksongengani gimin ia stadium-ko ta·raken matchotatna jotton ka·enga.
Ia JN Complex-ko rikna gita re·anggipa 2021 bilsini December jao a·dokni Chief Minister Conrad K Sangma-ni jakchi pangchakaniko songe on·angahachim.
Meghalaya a·doko Northeast Olympics, Meghalaya Games, Northeast Youth Summit, National Table Tennis Championship aro uandakgipa dingtang dingtang dal·dalgipa program-rangko sokachakna miksongengani gimin ia stadium-ko sorkari ta·raken rikenga ineba Lyngdoh parakataha.
Lyngdoh-ni parakatani gitade, JN Stadium-ko ru·uta bilsirangna maming taridapani gri galchipani ja·man da·o bilsi 30-ni ja·mansa taridapengahachim.