TURA: Garo Students Union (GSU) Phulbari regional unit-ni gital dilgiparangko seokna gita re·baenggipa April jao election-ko ong·atgen ine Bristibar salo, GSU Western Zone (North) Dadenggre-ni president Tengsan M Marak u·iataha.
GSU Phulbari unit-ni gital president aro secretary-ko seokna gita election-ko ong·atani tarikko GSU-ni chief election commissioner Probash D Sangma aro deputy chief election commissioner John Clever A Sangma u·iatgen ineba Marak parakataha.
GSU Phulbari regional unit-ni gital dilgiparangko seokna gita election-ko re·baenggipa April 9 tariko ong·atgen ine adita salrangna skangsan, GSU-ni chief election commissioner Probash D Sangma u·iatahachim.
GSU Phulbari unit-ni election-ko ong·atna gita nomination-rangko March 21 tarikoni March 25 tarikona ra·chakanggen, nomination-rangko April-ni 2 tariko scrutiny ka·gen, pu·onaniko April-ni 9 tariko ong·atgen aro apsan salon result-ko parakatgen ineba ua parakatahachim.
Ia election-o GSU Phulbari regional unit-ni president aro secretary-ni kamna susana sikenggipa candidate-rang, skanggipa India a·songo songdongkamgipa ong·na nanggen, A·chik jatonin atchigipa ong·na nanggen, president-ni kamna komibeoba graduate aro secretary-ni kamna Class 12 pass ka·gipa ong·na nanggen, maming ong·gija dakgipa kamrango jak donggipa ong·na nangjawa, office-rango kam ka·gipa ba man·gnirang donggipa ong·na man·jawa aro komibeoba bilsignina GSU-ni membor ong·gimin ong·na nanggen ineba GSU Phulbari regional unit-ni election commission u·iataha.