TURA: West Khasi Hills a·jani Nengchigen jolrango niam gri koela bikotaniko champengna gita Meghalaya High Court an·tangan ja·kuko de·ahani gimin Nengchigen songni manderang, mittelpilaniko parakataha.
Supreme Court-ni niamrangko pe·e aro songo donggipa manderangni kosako re·e ia songo donggipa koelarangko niam gri bikotengani gimin adita salrangna skangsan, saksa Kristina Marak minggipa mandeni dilanichi songni manderang, mande saksnini kosako FIR ka·doangahachim.
Nengchigen songo niam gri koelarangko bikotenga ine songbadrango koborko on·ani ja·man, iani bidingo am·sandianiko dakchina gita High Court, Meghalaya a·dokni Chief Secretary aro Director General of Police (DGP)-na ge·etaniko on·angahachim. Da·o iani bidingo dingtang dingtang gadangrango am·sandianirangko dakenga aro ian da·o High Court-ni jako ong·engahachim.
High Court-ni ge·etaniko man·enba, district administration aro police dolrangba ia songona re·ange am·sandianirangko dakangaha.
Indake ong·engon, ia songo niam gri koela bikotaniko champengna ta·raken ja·kuko de·atahani gimin Nengchigen songni manderang, High Court-ko mittelpilataha.
“Chingni songo niam gri koela bikotaniko champengna ja·kuko de·chakatahani gimin chinga High Court-ko mittelpilna ska aro chinga kakket bichalko man·na ka·dongenga,” ine Nengchigen songni Kristina Marak parakataha.